Alegasyon kontrad presidente na PSU malet ton imburi

Written by Danny O. Sagun, PIA

DAGUPAN CITY, March 3 (PIA) – Mapekder ya imburi na presidente na Pangasinan State University iray alegasyon ed korapsyon kontrad sikato ed agawan KBP Forum diad Philippine Information Agency nen Huebes.

Impaseguro met nen Dr.Victoriano Estira ya sikatoy maksil ni ya mangidaulo na alenleneg ya state university ed probinsya diad ontombok nin apat taon kontra ed ibabagan sikatoy makapuy la ta sinmilong ed heart by-pass ed imbeneg a taon.

Inkuanton mibabali tan getman manderal labat iray manrereklamon melag a grupo na managbangat ed PSU nen nansulat irad sangguniang panlalawigan pian kontraen so pakaturo to parad mikaduan termino tan kerewen so imbestigasyon ed saray ibabagan iregularidad ya agawa ed panaon to. Inkuan na grupo ya indauloan nen Lorna Urbiztondo ya kinmapuy so eskuelaan nanlapud inimplementa nen Estira so open admission policy no iner lukas so PSU parad amin ya estudyante.

Getma nen Estira, 61, ya nagamoran so mikaduan apat-taon ya termino. Mansampot so termino to no Hunyo.

Inkuan da ya kulang tan makapuy laray pasilidad lapud karakel na estudyante tan walalaray mankaklase ed arum a lugar pati diad silong na kakiewan.

“Aliwan tua tay ibabaga ra,” inyebat to legan ton inangatan iran mangisegep la na kaso ed korte pian ebatan toy akusasyon da. Kinerew to met ed saray managpalapag ya bisitaen da iray campus na PSU pian personal dan nanengneng so aktual ya situasyon.

Inturo to ni ya malet ya ipapakurang na eskuelaan so istrikton panangawat ed estudyante parad saray kurson kaukolan so board exam singa nursing, engineering, architecture tan education. Lapud saya, atagey so passing rate na PSU, kuanto, tan pigara ed saray naneksamin so kabiangay topnotchers ed interon bansa.

Impalinew to ya lukas iramay kurso ya agla kaukolay board exam ed siopakaman pian naitday pankakanwnawa iray mairap bilay ya mankagatin ed kolehyo. Balet inyarum to ya kaukolan dan ontombok ed atagey a estandarte na eskuelaan pian sikaray mansiansian manaral diman.’”Sori na lang no agda nayarian.”

Ed kipapasey laman to, inkuanton sarasarag to nin gawaen iray trabaho to angaman sinmilong ed operasyon katantaon. Inturo to ya pigaran kabkabat a personalidad so sinmilong met ed parehon operasyon balet ta nagagawaan day trabaho ra. Insita to bilang ehemplo ira di datin Arsobispo na Lingayen-Dagupan Oscar Cruz tan Senador Edgardo Angara ontan met na say presidente na Bulacan State University.

Indepensa to met so impangilukas na Alaminos City campus ya ibabagan iligal so operasyon to lapud angapo ni permit nanlapud Commission on Higher Education. Inkuanton ipaparaan iray manepeg iran dokumenton kaukolan na CHED parad pangisyu na permit.

Impalinew to ya say PSU campus so inletneg lapud partnership na PSU tan gobyerno na syudad diad panangidaulo nen Mayor Hernani Braganza tan bilang suhestyon na National Economic Development Authority. (DOS-PIA 1 Pangasinan)

Advertisements

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s