Batik na negosyo ed 2011 maong so ingapo to – ECOP

Written by Danny o.Sagun, PIO/PIA Pangasinan

DAGUPAN CITY, Enero 7 (PIA) – Marakep so gapo na taon 2011 ontan met ed batik na negosyo, inkuan na sakey a negosyante ed sayan syudad tan lider na saray managempleyo ed Rehyon 1.

“Ganado iray negosyante ta marakep so ingapoy taon, marakep iyan sinyal,” inkuanen Salvador “Ed” Poserio,regional president na Employers’ Confederation of the Philippines (ECOP) ed agawan KBP Forum nen Huebes ed Philippine Information Agency. Ilaloan ya lalon ombulaslas tan ombaleg so panagpoonan tan negosyo ed sayan syudad tan diad interon rehyon, inyarum to.

Inimano nen Poserio ya mas daiset so nagagawan panagreklamo na labor sector ed silong na peles ya administrasyon no ikumpara ed imbeneg. “Lagi ta walay talek dad maptek ya dalan nen Presidente NoyNoy tan baleg so mandato tod saray karaklan singa impanengneng na imbeneg ya eleksyon.”

“Akin et manprotesta ka ni no amtam ya dugay gagawaen na administrasyon. Wadatan kasi talek tan ilalo na totoo,” inyarum to.

Inyarum nen abogado Napoleon Arenas ed agawan media forum ya baleg so respeto na management tan labor sector ed kinen labor and employment Secretary Rosalinda Baldoz lapud kuanton malaknab ya background na sekretarya ed parehon sector.

Kaleganan to, impalinew nen Poserio ya ag iyiendorso na ECOP so tatawagen a job contracting angaman malaknaban ya ipapakana na saray arum a negosyante lautlad mall tan food business. Inkuanton nayarin ipakat so contractualization no say negosyo et onkakapuy. “Balet ta no makakalmoy negosyo, akin et ipakana ni, kaukolan inabang na negosyante so nanaalmo tod saray empleyado to,” indanet to.

Inkuanton diad sarili ton negosyo et aagamilen toy tinawag ton productivity and profit sharing ed saray totoo to ya rum ed sikara et abayag lan kaiba to.

Inkuan met nen Arenas ya getma labat na saray arum a negosyante ya iwasan so pangiter na benepisyo ed saray empleyado kanian ipapakana ra so labor contracting.

Impalinew ton inabuloyan na Supreme Court so job contracting ed kundisyon ya say kumpanyan mikontrata et walay suston kapital, eksperiensya tan ipapasal toray empleyado to. Say nagagawa balet, kuanto, walaray ompapaway a fly by night iran contractor.

Ag ombaleg iratan ya negosyo no aliwan lapud labor contracting, inkuanen Poserio ya tutuloyen toray angkakabaleg a negosyon mall. (PIAPangasinan)

Advertisements

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s